Tyihäntoimittaja

Ja täälä höpötethään mitä miehleen tullee ja sitähän tullee.
3 minutes reading time (692 words)

Autokauphiaan urala, muttei hulluna päissä

Autokauphiaan urala, muttei hulluna päissä

Tässä pari päivää sitte Facebookissa yks kaveri kerto että oli saanu suklaatia lahjaksi joltaki asiakhaalta jota ei ollu ees palvellu, niin mulla tuli miehleen omat kokemukset yhestä työmaasta. Molen kans ollu monenlaisela työmaala ja ko mie tykkään ja olen koasti kiinnostunu autoista niin miepä kokkeilin vähän aikaa automyyjänki hommaa. Uusia fiiniä autoja möin Herttoniemessä aivan sielä pääkaupungissa, tai no ainaki koasti yritin myyvä. Neljä kuukautta mie sielä pyörin pukutakki päälä uuven auton haijussa, kaatamassa takaistuimia etheen ja taka. Kovakaulus hinkkas kaulaa verile, mutta sain mie muutaman autonki senthään myytyä, mutta oli se kovvaa hommaa ko koa oli sielä kilpailu, varsinki ko samoja merkkiä sai lähiseuvulta toisestaki liikheestä. Eikä siittä uuven auton myynnistäkhään paljoa ittele jääny, ettei sillä olis löyny kyllä leivilekhään.

No kerran mulle tuli semmonen vanhempi venäläismies ostahmaan auta sen nuorele klossile, joka oli just saanu kortin. Het taisit ajjaa fiinilä mersula itte, mutta pojale halusit ostaa semmosen pienen perhepiilin, mutta tietysti vähän paremmin varustellun mallin. Hintaa sillä taisi tulla reilu 30 000 euroa, mutta hyähän son nuorele hommata uusi turvalinen piili. Saima tehtyä kaupat ja laitoin auton tillaukseen ja se tulis sitte parissa viikossa. Eipä siinä mithään ko ajan kansen se piili sitte tuliki ja laitethiin kunthoon oottahmaan luovutusta. Mie sitte ilmineehraahmaan asiakhaale, että koskas passaa tulla auton hakhuun ja tämä mies sannoo, että hethän peru sen kaupan sähköpostila jo sillon heti ja ovva sittenki ostahneet käytetyn, että olivat hunteerahneet että se aivan uusi solis liian fiini sille klossile. Mie tietenki aivan ihmeissään, että ei mulle veikkosten ole tullu mithään viestiä perumistesta ja jos oliski, niin johan molisin kuitanu sen heile takasinki jotenki. No hän sano että tullee sitte tiskuteehraahmaan ja selvithään tilannetta paikanpääle. Tosihaan viestiä ei ollu koskaan tullu mulle asti, mutta löysimä met jälkiä sähköpostipalvelimelta että olivat viestiä lähettähneet, mutta soli palvelin syöny sen viestin.

Asiakas sitte saapuu tiskuteehraahmaan, että mitäs tehhään ko molema tilahneet auton valhmiiksi liikheele ja nyt sitä ei sitte ostetakhaan ja siittä hyästä häätys sitte maksaa kuitenki sen auton varrausmaksu vai miksis sitä nyt sanothaankhaan, ja se taisi olla vielä 10% auton hinnasta. Hyijä molin pahassa paikassa ko olihan se kauhea tilane ko toiset luulit peruhneensa ja meile ei viesti tullu perile. Autotalon kymppi oli kuitenki äkäsennä, että kyllä se 10% häätyy maksaa tai ostaa auto poijes ko sielähän se hallissa heitä oottaa. Kyllä soli herra vähän pettyhneenä tietenki ja ei sollu ko hyäksyä tämä reilun 3000 maksu ilman mithään vastinetta. Mutta mikä soli hulluinta, niin senki jälkhiin tämä herra haki autosta mulle votkamäyräkoiran, semmosen missä oli yhteenä 6 litraa votkaa! Oisittapa nähneet toisten myyjitten ilhmeet ko se nostautti sen minun pöyväle, varsinki ko net tiesit, että mie en viinasta perusta. Mie kiitin kohteliaasti ja toivotimma hyvät joulukki. Ko asiakas oli läheteny, niin mulla oliki pöyvän eessä jono pörröjä kolleekoja ja häätyhän se niile pullot tietenki jakkaa ja vein ainaki yhen vanhoittenki autojen puolele ko sielä oli hyä tyyppi kansen ja sillekki tais maistua, vaikka oisinhan mie tietenki saattanu net kaikki lavuaahriinki kaataa.

No sitte vähän myöhemmin mulle soittaa yksi mies ja sannoo, että hän ei ole autoa meiltä ostamassa ko hän on Virosta tuomassa yhtä semmosta raisumpaa nelivetoa jota mekki kyllä myythiin, mutta hän tarvi apua tullihommien osalta ja hääty tietää jonku jutun siittä autosta, että minkälainen soli jos solis aikohnaan tuotu suohraan Suohmeen uutena. No mie palvelualthiinaa vain sitte selvitin sille sen pikkujutun siittä mallista meän maahantuojalta ja ilmineerasin sen sitte sille sähköpostila miten asiat olit. Koasti hän kiitti minua ja eikö vain yksi päivä tullu käyhmään kaupalaki ja toi mulle kahen litran Viru Valgee -pullon. Oisittapa nähneet kolleekojen naamat taasen. No mie kiitin taas koasti, mutta en mie sitä pulloa näile loppasuile antanu senthään, enkä ees tarjonu maistiaisia. Son se pullo mulla tullu muuttokuorman matkassa tänne ylös ja nyt son 7 vuotta ollu tuola kellarissa, jokhaan son vuosikertaa.

Emmie poka tajua miten mie sainki tuota viinaa niin mahottomasti sielä, ko ei net muut myyjät saahneet asiakhailta mithään pulloja. Kuinkhaan suuri viinavarasto sitä oliskaan ollu, jos olis saanu myytyä enemmän autoja tai oltua vain vähän pitemphään töissä sielä. Mihis sitä viinaa voipi käyttää muuhun ko ei sitä saata itte jua, oos sille olemassa parempaa käyttöä? Ja mitäs tästä opima, no sen ainaki että autokauppihaana pyssyy viinoissa myi sitä autoja eli ei.

6
Kaikenmaailman siton järjestelmiä!
Ala-aste 70-luvulla
 

Comments

No comments made yet. Be the first to submit a comment
Already Registered? Login Here
Guest
14.08.2020

Captcha Image

By accepting you will be accessing a service provided by a third-party external to https://vaylanvarsi.net/