Tyihäntoimittaja

Ja täälä höpötethään mitä miehleen tullee ja sitähän tullee.
3 minutes reading time (673 words)

Merta eemäs kuvvaahmaan

Merta eemäs kuvvaahmaan

Molen poka hommannu uuven kameran ko kaikki sukulaisekki ovva ostahneet hienot kamerat ja ko mulla oli jo seittemän vuotias pokkarikamera. En sunkhaan mie mithään kilpavarustelua ko johan soli aikaki hommata vähän parempi kamera, koi koskaan tiä vaikka tulis ammattilainen ko vain on kunnon kamera millä ottaa ammattilisen kuvia.

Nytten mie hommasin semmonen bridge-kameran, joka ei ole semmonen täysiverinen järjestelmäkamera, mutta siinä on vähän niinkö taskukameran ja järkkärin hyviä ja huonoja puolia sopevasti Mie ko hain sen postista, niin hääty Korvassa pysähtyä ja kuata jouttenia ja paria poroaki ko siihen somasti sattuivat. Hääty kyllä ottaa älykhäälä toiminola ko ei tajunu mithään niistä käsisäätöhommista.

Lauvantaina päätin sitte että nyt mie lähen bongaahmaan lintuja oikein erämääjärvile eli lammile. Hunteerasin, että kurvaampa semmoselle tiele mitä en ole vielä koskaan ajanu ja niin mie ookasin ensin Rantajärvele ja sieltä sitte Soukolojärven tiele. Kartasta molinki kattonu, että sielä on järviä muutampia tien vieressä, että sielä on hyä vaania lintuja. 

Sielä mie sitte ajan ja niinpä näin pienen järven mettän takkaa ja eikö auto parkhiin ja kumpparit jalkhaan, että pääsee lumivallin yli, ko sielä oli vielä semmonenki reilun puohleinen jälelä. Rytteikön läpi sitte lammen ranthaan risut rytisten ja niin se alko jouttentenki tööttäily kuulua, kummakhaan ko säikkyvät sitä rytinää. Sielä oli järvessäki melkein täys jääki vielä, mutta oli senthään vähän vettäki näkösällä, että jouttenet saatoit sielä kurpoa. Sielä oli vain yksi pariskunta ja muuten ei mithään muuta elävää, vaikka ootin kyllä että hetkelä millä hyänsä karhu tietenki tullee sihtaihmeen, mutta eivät olheet vissiin herähneet vielä. Jouttenekki oli vähän turhan kaukana ja taleerasit vain jäälä, sunkhaan semmosta suita kauaa kattoa, eli eikö takasin autole ja kaasu pohjaan. 

No siinä niitä järviä oli, mutta nolit talot teitten päässä, niin en mie sinne sitte viittiny mennä ja eikä sielä järvilä kyllä ees näkyny mithään mitä olis ees kuvanu. Somia pikku kyliä sielä oli keskelä mettää ja kohta tuliki Kärsiäisenjärvi kohale ja siinä piti promsata. Sitä mie vähän niinkö oli menossaki kathoon ko äiti ja täti sielä on laukkohneet kuvvaamassa ja makkaraa paistamassa. Mie lompsin ranthaan, niin eikö siittä just lähe joku vesilintupari hulluna pakhoon ja niin soli seki järvi tyihä kuvattavista. Oli sielä toisessa päässä jokku kaks lintua, joita mie sitte koitin sihata ja samala värkätä kameran säätöjen kanssa. Huono son ees värkätä säätöjen kansa jos kuvvauskohteet on niin pirun kaukana. Mie päätinki että nyt pelathaan varmanpääle ja ookaan suoraa Korhvaan ko sielä on kuiten laumoittain jouttenia. No niin, mie tulinki kohta Korhvaan ja sielähän niitä jouttenia oli harjotusta varten mahottomasti. Sielä net kosiskelit ja uhittelit kilpakosijoile, jokku taleerasit pellola ja jokku yrittivät nukkua siinä mahottomassa huuvossa. Sattu tietenki harmaa päivä, että tieny miten olis valotusta säätäny ja pirun kylmä tuuliki ploosasi ettei meinannu tareta kyykkiä rannala. Hyi olkhoon ko sielä oli holotna, että hääty lähteä kotia ajahmaan ja jäähä oottahman parempia ilmoja, että saattaa mennä ulos värkkäähmään kameran kansen.

Ko mie kerta olin jo ajellu eeskahtaale, niin mie päätin käyä vielä samoin mukin kattomassa onko Vyönin tie poikki. Ookasin sinne ja olihan se, väylä meni rohki yli. Käähnäytin piilin kieli keskelä suuta tulvaoijitten välissä ja samala näin speekelistä, että joku toinen piili on tulossa sinne kansen, mutta se jääpiki Näätäniemen tienhaahraan. Arvatenki mietti sielä, että onko väylä menny tien yli ko sillä oli slääppiki völjyssä. No ko mie ookaan tulla takasin niin se plinkuttaa valoja. Mie aukasen ruutun ja jännitän että pittääkö juuri alkaa praatihmaan ruottia, mutta ei vaineskaan ko heti omala kielelä mies kyssyy, että mikäs son homman nimi ja vaimopuoli sieltä sannoo että hään se sano että promsata veikkosten tähän että oottavat kattoa mitä mie tehen ensin. Mahottoman mukavia olivat ja kovia praatihman ja olivat Jällivaarasta tulossa, joku yhteys niilä vissiin oli kylhään ko tyristit ei varhmaan slääpin kans aja. Olivat kovasti nöitiä, että siinä kohtaa saivat sitte alkaa vekslaahmaan slääpin kanssa, muuten olis pitäny perruuttaa pitkä matka takasi. Meilä oli samanlaiset fiinit piilitki ja met praatima niinkö oltas oltu yhtä suurta perettä.

Ei minusta kyllä tule mikhään lintujen kyttääjä, suita sielä oottaa että jotaki tapahtuu, kyllä molen enemmän semmosten urpaanitten juttujen kuvvaaja, mutta ei mene senkhään kansa putkeen ko assuu täälä missä ei juuri ole mithään urpaania mitä kuata, no ainaki on fiini kamera jossei muuta.

3
Vähemistö, surkeampi homma!
Jos autot olis tietokonheita

Samanlaiset artikkelit

 

Kommentit

Vieras - Yks tyär päiväyksellä 15.05.2016 23:27

No perskuta, solet sieki alkanu hifistelehmään nuitten kameroitten kans. Onhan se kuule hienoa ko on kapistus täynä nappia ja nupikkaa, mutta hommaa ny äkkiä joku viisaahmaan mihin niitä käytethään tai käypi niinko mulle. Sillä molen automaatila räpsiny tiput ja heinät kuata.

Ja just kuule meinasin takertua tuohon Vyönin urbaahniin ko sie myönsikki, että sielole ko tulvaveen vahtaajia koko kylässä

No perskuta, solet sieki alkanu hifistelehmään nuitten kameroitten kans. Onhan se kuule hienoa ko on kapistus täynä nappia ja nupikkaa, mutta hommaa ny äkkiä joku viisaahmaan mihin niitä käytethään tai käypi niinko mulle. Sillä molen automaatila räpsiny tiput ja heinät kuata. Ja just kuule meinasin takertua tuohon Vyönin urbaahniin ko sie myönsikki, että sielole ko tulvaveen vahtaajia koko kylässä :D
Oletko jo rekisteröitynyt? Kirjaudu tästä
Vieras
11.12.2018

CAPTCHA