Tyihäntoimittaja

Ja täälä höpötethään mitä miehleen tullee ja sitähän tullee.
7 minutes reading time (1317 words)

Etiäiset - onkhaan niitä?

Etiäiset - onkhaan niitä?

On tietenki etiäisiä, jos kansanuskhoon on uskominen ja miksipä emmä uskois? Wikipetia kertoo, että son niinkö henki joka tekkee eeltä sen mitä sitte se oikea ihminen tekkee kohta perässä, eli etiäinen saattaa tulla pirthiin niin että kopse käypi ennenkö vähän perästä tullee sitte se varsinainen roppa. Kait son vähän sama ko ennakkoaavistukset tai enneunetki, eli näkkee tai tuntee jotaki ja sitte se tapahtuu.

Mulle etiäiset on sanana tuttu kläppinä näkemistäni kläpittenohjelmasta, jonka nimeä vain en ennää muista. Mie muistelen että se oli semmonen Laphiin sijottuva tarina tai saatto niitä olla useampiaki, jossa jännälä tytön äänelä kerrothiin vielä jännempiä juttuja, sitte siinä tais olla vain semmoset liikkumattomat kuvituskuat sitte kuvalisena viestinä. Tarinoissa vilisit revontulet, paukkupakkanen, riekot, suet, Lapin noijat ja net etiäisekki tietenki. Äänitehosteina oli riekon naurua, narisevia ovia ja pakkaslumen narinaa askelten alla. Molen yrittäny selvittää että mikä se ohjelma saatto olla tai kenenkä tarihnoihin net pohjautu, olis hauska nähä niitä uuvestaan. Olen mie Yleisratioltaki yrittäny selvittää, mutta en saanu ratkasua. Jos sulla on mithään aavistusta tästä ohjelmasta, niin kommentoippa ihmeessä.

Mie pari viikkoa sitte laitoin nukhuun yhtenä iltana ja mulla alko soija päässä 80-luvun T'Pau-yhtyeen hitti "China in your hands". Se soi selkeännä ja kovvaa, mutta sain mie sitte lopulta unen päästä kiini. Yhtyeestä en ole kuulu varhmaan mithään parhiin kymmehneen vuotheen, eli en tieny onko ollu olemassa vaiko eikö. No sitte mie aukasen Spotifyn tässä pari päivää sitte ja mitäs sieltä pomppaa naamale ko se että T'Paulta tulossa uus levy ja tosihan soli. Eivät olheet tehneet mithään ainakhaan 15 vuotheen ja nytte sitte taasen. Olikhaan se etiäinen ja jokhaan minua voipi sanoa samaaniksi? No ei pelkästään tämän takia ko näin mie tässä taahnoin jotaki untaki ja seuraavana päivänä kaveri soittaa ja puhhuu jostaki jota mieki näin justiinsa siinä unessaki jotaki. Laitan noitarummun justiinsa tillaukseen. No en vaiskaan laita, mie selitän nämätki ennakoinit hyälä sattumalla. Tähän häätyy vielä toeta että se että T'Pau pomppasi sieltä Spotifystä saatto olla markkinamiestenki aikhaansaannosta ko mie pörrö menin ja katoin sen viteon sitte seuraavana päivänä Yuutuupista ja markkinamies tietää kyllä mitä met tehemä netissä, että se voipi sitte tyrkyttää meile jotaki hyvvää siihen liittyen toisessa paikassaki.

Kuinkas paljon met näemäkhään unia ja mitä kaikkea muutaki met aattelemma jokhaisena päivänä, mutta aika harvoin se tahtoo mennä niin, että tapahtumat menis sen mukhaan mitä mielessä on pyörittäny, tai että siltä seisomalta se ihminen soittaa jota aattelee. Annappa ko tapahtuuki sinne päin, niin jovain sen muistaa ja sitä pittää mahottoman merkittävänä hommana. Son vähän sama ko ennustaja tai horoskooppi ennustaa jotaki ja jos sei sitte tapahukhaan, niin kuas sen höpötykset muistaa, mutta jos käypiki totheen sinne päin, niin silloinhan sitä heti uskoo että kyllä se vain tiesi. Sitte ko sielujen sympatiat tällä tasola saatethaan sokkokokheila to'istaa, niin mieki uskon juuri varsin.

Mullekki on kläpistä asti syötetty virallista ajatusta, että molema vähän niinkö onnettomia marionettia, että meitä ohjaa korkeampi voima joka sitte päätäpahkaa keksii meile mitä kummallisimpia asioita vissiin pikkumaisuuthaan tai muuten vain ja auta armias jos sitä ei kunnioita niin sitte varsinkhaan kunnian kukko ei sulle laula. Pitäis palvoa ja anela armoa, että pelastuis tulikiveltä jne. tai vähinthään katua sitte viimein portila. Jotaki pahhaa tai hyvvää tapahtuu, niin son kaikki lähtösin sieltä ylhäältä ko niin son tarkotettu. No sitte ko ikkää tuli, niin sitä alko miettihmään itte vähän tarkemmin että oos siinä mithään järkeä tai että mikäs solis niinkö toennäkösyys semmosseen että sielä joku jaksais valvoa mitä mie tehen tai olen. Sanoin piutpaut semmosille tarinoile ja rituaaleile, ko minusta niilä opeila haluthaan pölätellä ja hallita "lamphaita" aivanko muuten ei osattais ellää ihmisiksi.

Vaikuttaa kovasti siltä, että hyät tai pahat asiat tapahtuu aivan kelle vain uskoit sie horoskoophiin, ennustajaeukhoin tai palvopa sitte mitä henkiolentoa tahansa tai olekko sie palvomatta. Ei riitä rukkoilut, eikä seremoniat tai hyä tahtokhaan pelastahmaan yhtään mithään. Ihminen muistaa vain justiinsa sen ko joku ossuu kohale, silloin totteutumattomilla toihveila ei ole mithään merkitystä ennää ko yksiki kohale osunu asia pyhkii kaikki turhat yritykset mielestä. Ja jos joku kokkee pahhaa, niin toisten mielestä son tietenki rangastus ja kohe itte aattelee että se oli nyt jonku suuremamman tahto, että häntä nyt koetelhaan, huija sanon mie.

Molen kerran nuorempana kaottanu pörsin, soitin sitte epätoivossani kuulule haaparantalaisele selvännäkijälle, joka kerto että son tippunu kartanolle ja joku poika vieny sieltä. Hyvä arvaus, mutta pörsi oli ollu vänkärin penkilä ja tippunu auton penkin ja vänkärin oven välhiin ko olin kurvannu mummohlaan. Sieltä se sitte löyty ko satuin aukasseen vänkärin oven kerran. Kaivon taikavarvula kattojat eivät onnistu löytähmään testeissä vesiastioita, mutta hyän kaivon paikan löytävät kyllä, tai sitte vesi vain löytää sinne syvhään kaihvoon. Jokku etänä siirtelee maasätteilylinjoja ja toiset mainovat valotusvirhheitä valokuvissa enkeleiksi tai hengiksi. Näettäs tet, molen vähän eppäileväinen näihin asioihin joita ei sokkotestilä saateta toistaa, siton turha mulle sanoa että ei se kukko käskemällä laula. Molen lukenu yhestä kokheesta, jossa mitathiin sokkotestilä rukkousten tehoa. Oli ryhmä rukkoilijoita ja sairaalassa pari eri ryhmää joitten puolesta ryhmä rukkoili. Toinen ryhmä tiesi että heän puolesta rukkoilthiin ja toinen ei tieny koko hommasta mithään. Sitte ko tutkithiin miten ryhmien olo koheni, niin arvakkaapa miten kävi. Se porukka joka ei tieny että jokku rukkoilee heän puolesta toivuit paremmin ko net jokka tiesit että heän puolesta rukkoilthiin. Selityksenä tähän oli se, että heilä oli paihneet voia paremmin ko het tiesivät että joku rukkoilee heän toipumisesta. Net jokka ei tiehneet tuon taihvaallista toipuvat vain oman ittensä vuoksi omhaan tahtiinsa. Mitäs tästä opima? No sen että ei kannata ressata.

Yksi mentalisti telkussa pyysi yhtä laulajatarta aattehleen jotaki oikein kuulusaa laulajaa ja pyysi tätä sitte kävelehmään kiekan lavala, että hän arvaa kestä on kyse. Se käski tekheen vielä sitä ja tätä ja varsin tiesi kyllä ketä tämä laulajatar aatteli ja laulajatar piti tätä tietenki aivan uskomattomana juttuna. Mentalisti paljasti miten temppu tehtiin ja sehän tehtiin niin, että mentalisti oli laittanu sopevasti muutaman tämän kuulusan laulajan julisteen sen laulajattaren reitile ko tuli sinne lavale. Tämä laulajatar oli siis alitajusesti ohjattu valitheen justiinsa tämä mentalistin valittema henkilö ja niinhän se haksahti siihen ilman että olis ymmärtäny julisteitten yhteyttä asihaan. Ihmisen psykologia on pelottava juttu ja siihen son helppo vaikuttaa niin monela tavala olipa sitte kysseessä verkostomarkkinoinnin, uskonnon, kaveriporukan tai vaikka poliittisen puolueen tapahtumat, jossa porukhaan nostethaan semmonen hurmiohenki, että ihmisille myyhään mitä vain. Molen kerran itte suohraan sanottuna ryöstetty keskelä Lontoota hurmiohenkisessä "turistihuutokaupassa", siihen tarvithiin vain taitavaa teatteria ja tunnelman nostatusta, niin jopa pörsit aukes ja koko porukka tuli huijatuksi, jokku hävis enemmän ko toiset. Ei sitä voinu käsittää sielä tapahtumassa mitä siinä oikein tapahtuu, vasta ko tilasuus päätty ko seihnään ja kyöräthiin ulos, niin kaksin kerroin nauroima ka'ula mitä molima kokehneet. Ko olthiin toivuttu siittä hommasta, niin saima seuraavana päivänä senthään osan rahoista takasi ko uhkasimma poliisilla tai jäähä paikale tiottahmaan toisia turistia että mikä son homman nimi. Tuon jälkhiin molen oppinu tunnistahmaan asioita, joissa yritethään virittää hurmiohenkeä porukhaan ja niissä taphauksissa käytethään hyäksi myös ryhmäpainetta tavala tai toisela ja ussein sitä että annethaan ymmärtää, että solet poka tyhmä jos et sie tähän usko ja sillon pitäis viimestään hälytyskellojen soija. Joukossa vissiin tyhmyys tiivistyy niinkö sanothaan.

Mie uskon siis sattuhmaan, hyvhään ja pahhaan. Met tehemä niin paljon asioita, elämä siis kaaoksessa, jossa toinen tekkee toissaala tätä ja toinen toista jokka voivat vaikuttaa sinne, tänne ja vaikka miten. Joku myöhästyy minuutin ja pistää toisen aikataulun uusiksi ja sitte tapahtuu tai ei tapahu jotaki asiaa. Yks päättää soittaa kaverille justiinsa ko toinen on aatellu tätä, ko toisela kertaa se onki justiinsa saunomassa ja päättääki soittaa vasta viikon päästä tai ei soita koskaan. Perhonen läpsäyttää sopevasti siipeä Afrikassa, niin kuukauven päästä kovempi tuulenpuuska kaataa hihtäjän Lapissa hankheen, semmosta son. Jokku saapi vissiin lohtua siittä, että voivat selittää asioitten johtuvan jostaki suuremmasta tai vaikka yksisarvisten energian puutheesta, se heile sallittakhoon, mutta mie piän tärkeämpänä ellää ommaa elämää ihmisiksi ja tehä siittä omansa näkönen, sitä voipi yrittää itte vaikuttaa omhaan elähmäänsä sen mukhaan ko haluaa sen olevan tai menevän, siltä osalta ko vain voipi vaikuttaa. Kaikheen ei kuitenkhaan saata vaikuttaa milhään ja siksi ymmärtää seki, että asioita tapahtuu haluspa niitä tai ei, lohuttipa se tai ei. Ei asioila tai tapahtumila tarvi olla aina jotaki tarkotusta, eli son vain sitä elämää ja siittäki selvithään tavala tai toisela – jossei lopu ja loppuuhan seki varmasti joskus.

2
Matkakertomus avartaa
Napapiirin sankarit
 

Comments

No comments made yet. Be the first to submit a comment
Already Registered? Login Here
Guest
27.09.2020

Captcha Image

By accepting you will be accessing a service provided by a third-party external to https://vaylanvarsi.net/