Tyihäntoimittaja

Ja täälä höpötethään mitä miehleen tullee ja sitähän tullee.
4 minutes reading time (755 words)

Talkoo- ja vappaaehtoshommia

Talkoo- ja vappaaehtoshommia

Mistä on tapahtumat tehty? No talkootyöstä ja vähäsestä rahasta. Harvassa tahtoo olla meän perälä tapahtumat mikkä elis lipputuloila niin että esiintyjät saisit reilua korvasusta saati järjestäjätki vielä jotaki korvausta. Eipä se on se mukava tehä yhessäki ja pistää pieniki panos johonki josta on iloa niin ittele ko muilekki. Ennen aihaan sitä oli talkoita enemmänki ja ihmiset lähtiväkki aphuun helpommin, mutta nykyhään moni ei kehtaa lähteä mihinkhään mistä ei rahhaa saa. Työttömien häätyy vissiin pian varoa mihin mennee talkoissiiin, ettei sitä katota peräti työksi ja katkasta korvausten maksu... no tuo taitaa olla vähän harvinaisempaa senthään. Verottajaki on välhiin ollu kiinostunu talkoista, että josko mahollisesta talkoosapuskastaki häätys jo maksaa verot.

Samat naamat net tahtoo olla monien tapahtumitten takana vuesta toisseen, jokka tekkee ja värkkää mitä erilaisempia hommia ja järjestelyjä tapahtumien ympärillä. Sitte ko nämä samat naamat kaatuvat hauthaan tai muuten kyllästyvät, niin son viimein tapahtuma lopetettava, jos ei ole uusia tullu följyyn jatkahmaan järjestelyjä. Se tahtoo olla useasti niinki, että vaikka kuinka homma tehhään vappaaehtosena pienilä rahkeila, niin moitheita järjestelyistä saahaan kovin helpola, ilman että moittijat tietää mikä työ tai minkälaisela porukalla ja pienelä resurssilla homma on taiottu ylheensä kassaan.

Mitä ei itte osata tai pystytä tekheen, niin son sitte pakko ostaa ulkopuolisena työnä tai tavarana ja sitä varten häätys olla jonku verran tulojaki ennakhoon. Monet yhistykset jokka tapahtumia järkkäävät joutuvakki rahottahmaan toimintaa kerjäämällä sponsorirahhaa yrityksiltä, hakehmaan mahollisia avustuksia eri tahoilta, myyhmään arpoja jne. ja loput toivothaan tulevan kassaan mahollisesta pääsymaksusta, jos semmosta yleensä perithään. Pienistä virroista ne tahtoo putjetit tulla kassoin. 

Kesä on tapahtumien huippusesonkia ja erilaiset yhistykset järjestävät niin kulttuuria, markkinoita, autobingoa ja urheilutapahtumia, että joka viikola on vähinthään useampaaki meän väylän varrela molemmin puolin rajjaa. Menkää veikkosten ihmiset osallistuhmaan tapahtuhmiin vähinthään kattojina ja kannattahmaan siten toimintaa. 

Molen itte sekkaantunu jo muutamana vuotena auttahmaan esim. molempien Juoksenkien yhteisessä Swim the Arctic Circle -uimakilpailussa, joka uihaan Tornionjoessa. Suurin osa minun panoksesta tapahtuu pitkin vuotta hyäntekeväisyytenä semmosesta työstä mistä normaalisti ottasin elantoni. Itte tapahtumapäivänä tehen vain pienen osan käytännön kenttähommissa ja sonki kaikista palkitsevinta nähä kuinka hommat toimivat ja ihmisten naamala näkkee hymyn. Parasta on ollu kuulla kuinka ulkomaiset uimakki mainohneet jälkhiiinki että kuinka meän kilpailu on ollu mahtava. Meän voittajatkaan ei saa mithään juuri muuta ko pokaalin, että ei meile tulla uihmaan palkintojenkhaan takia ko elämyksestä. Kilpailijoitahan meilä on vähän täältä omalta seuvulta ko net tahtoo tulla etelästä ja melkein puolet on jo lähinnä muualta Euroopasta. Nyt 2017 tapahtumassa tullee olheen hurja määrä uimaria Englannista ja osa suunnittellee jo 2018 reissuaki. Sitte on ainaki saksalaisia, ranskalaisia, sveitsiläisiä, venäläisiä, italialaisia, irlantilaisia, ruottalaisia ja suomalaisia. Onhan se elämys ulkomaalaisile uija keskelä yötä valossa ja vielä ajassa takasinkäsin, että on maalissa ennenkö on lähtenykhään. Aika moni näistä uimareista tullee meile vain meän uinnin takia,  lentävät maailman ääristä ja vuokraavat vuokra-auton, majottuvat jossaki yön tai kaksi ja uintien jälkhiin takasin sammaa reittiä. Siihen nähen ei voi muuta ko ihmetellä.

Mie piän että minun panos on kuitenki pieni siihen nähen mitä molempien kylien kyläyhistyksissä tehhään sitte kentälä. Niissäki pienehkö porukka tekkee isomman panoksen ja olema kyllä onneksi saahneet paljon apua sitte itte tapahtuman aikana kyläläisiltä molemmin puolin väylää. Ilman näitä ihmisiä ei meänkhään uimatapahtuma olis mahollista pittää ko pelkästään valvontavenheitä, kajakkia ja kanoottia häätyy olla melkonen laivue valvomassa, ettei vain kukhaan kymmenistä uimareista hukitte itteänsä. 

Vaikka sitä tekkeeki tuomosten tapahtumien osalta talkootyötä ilman että saapi itte mithään korvausta, niin on se silti palkittevaaki. Saapi tehä pienen osan tapahtumasta josta on iloa kuitenki isole porukalle. Se pittää kyliä elävänä ja tässä taphauksessa melkosta matkailumarkkinointiaki koko väylänvarrele ko kilpailijoista harva ees majottuu itte mäen kylässä. Tietysti sitä toivoo, että se työ ruokkis kuitenki aluetta ja siten mahollistais tavala tai toisela ommaaki elämää näilä seuvuila.

Mie piän että moni saattas hyvinki olla apuna järjestämässä erilaisia tapahtumia, mutta ei oikein tiä miten tarjota ommaa panosta tai pelkää että ei ossaa tehä mithään tai että joutuu hulluna töihin. Mie kehotan että kannattaa rohkeasti vain ottaa yhteyttä tapahtuman järjestähjiin ja kysyä että olisko tarvetta avule ja että mitä saattas tai ainaki ossaa tehä. Ko mennee matkaan kyläyhistyksen toiminthaan niin sieltä kuulee lissää tai sitte vain ottaa yhteyttä johonki puuhamiehheen. Mekki pistimä uinnile pystöön nettikaavakheen, jolla on helppo tarjota ommaa panosta ja ko tarvetta tullee niin tiethään sitte ottaa yhteyttä ja tiskuteerata mitä pystyy tekheen ja missä olheen följyssä jne. Vaikka tarvetta ei oliskaan juuri nyt, niin son hyä että on ees reservissä käytettävissä jos tarve tullee. Jokhainenhan tekkee hommaa vapaaehtosesti, niin ainahan sitä omale työle voipi pistää rajat ja sitähän helpommalla jokhainen pääsee mitä enemmän on tekijöitä. Son mukavaa ajanvietettä ja sosiaalistaki, jos ei meinaa muuten saaha aikaa kulhuun. Ja jos kukhaan ei tehe mithään, niin mithäänhän meilä ei sitten olekhaan.

0
Vähemistö, surkeampi homma!
 

Kommentit

Ei vielä kommentteja. Voit kommentoida, jos haluat.
Oletko jo rekisteröitynyt? Kirjaudu tästä
Vieras
11.12.2018

CAPTCHA