Tyihäntoimittaja

Ja täälä höpötethään mitä miehleen tullee ja sitähän tullee.
3 minutes reading time (528 words)

Vähemistö, surkeampi homma!

Vähemistö, surkeampi homma!

Huija, tänhään mie suivaannuin. Molen ollu yhessä Facebook-ryhmässä, jonka kuvvaus kertoo että ryhmä on semmonen kieltä koskeva ja jos joku alkaa houraahmaan sielä, niin semmonen heitethään poijes porukasta. No mistäs sielä sitte praatithaan, no siittä kielestä ja sen ympärillä olevista asioista, mutta aika suosittuna aiheena välhiin nostethaan ylös yhen aktiivin toimesta tarinaa kuinka turvapaikanhakijat, pakolaiset ja ilmesesti siis myös maahanmuuttajat ovva pahat mielessä ja saavat kuulema kaiken. Sitten toethaan, että en ole rasisti mutta....

Molen sen verran ollu varphaihlaan sen asian kansen ko minusta net puhheet eivät siihen ryhmään sovi ollenkhaan ko sen ryhmän kuvvauski antaa ymmärtää, että sielä praatittais niinkö sen kielen asemasta, itte siittä kielestä. Mie piän houraamisena tuomosta porinaa sielä, mutta eipä se näytä ylläpitoa haittaavan, tiä sitte onko itte ylläpitäjä joka net jutut sielä justiinsa alottaa. Molen moittinu sitä hommaa sielä useastikki, että oos nämä aihheet sen ryhmän sivula sopivia. Nyt multa kysythiin, että piänkö tyhmänä sen kielen puhujia jos ei pakolaishommasta saa kerta puhua. No enpä mie piä ko lasken itteni ensinäki samhaan kielellisseenki vähemistöön. Voin kuitenki tunnustaa että piän tyhmänä niitä ihmisiä, jokka sielä ryhmässä yrittävät jauhaa turvapaikanhakijoista.

No eipä mithään, tänhään mie päätin sitte viimein nostaa niin sanotusti kytkintä eli lähteä pois ryhmästä. Son aivan tyihänaikhaista seurata sieläki ryhmässä pakolaisasiaa. Molen poka vähän samassa venheessä, eli maahanmuuttaja ja jos vaikka missä muussaki vähemistössä ja jos minut olhaan valhmiita tuomittehmaan ja syyllistähmään vain siittä hyästä, niin sei poka ei tunnu raposalta. Jos oman maan kansalaisilaki on kurjaa syystä tai toisesta, niin siittä on turha syyttää vähemistöjä, jokka ei aivan aikusen oikeasti ole oman maan "alkuperäsiä" asukhaita paremmassa asemassa. Jos sie synnyt johonki valtihoon, niin vissiin solet sielä alkuperänen siittä lähtien, muuten mennee hankalaksi hakea kua on alkuperänen ja kua ei. Voin sanoa että en ole alkuperänen tässä maassa, mutta jos joku kokkee minut uhkana tai vähempiarvosena sen vuoksi, niin häätyy vain ihmetellä.

Enniitten minua huvittaa se, että sitte samat ihmiset välhiin valittaa sielä, että kuinka tämä kieli on niin sorrettu, eikä saa oikeutta joka sille kuulus ja sitte ko itte olhaanki toisessa asiassa enemistönä niin jopa kuulema saapi vähemmistö kaikki ja vielä enempiki ja ovva kaiken muunki pahan syylisiä. Jopa verrathaan asihaan, että yksiki vähemistöryhmä olis ollu vissiin kollektiivisesti itte syylinen, että niistä on pietetty laitonta rekisteriä ja tästä syystä pyyelty antheeksi. Tämä kieli ei ole tehny mithään pahhaa ansatakseen kohtalonsa, vaikka ei senthään kielen puhujista ole tehty laitonta henkiörekisteriä.

Se miten maassa systeemi toimii ja ko kaikila ei ole asiat sen osalta niin hyvin ko aina toivos, niin sonki hyä syyttää semmosta jolla ei ole ollu ossaa eikä arpaa asihaan. Niinhän son aina ollu, että son helppo potkia päähän heikompaa ja oikein porukalla, kuas sitä nytten isommille tohtis sanoa mithään ja mitäpä sitä sen enempi miethiin ko vain saapi vain olla potkijan asemassa. Itkethään sitte vasta ko olhaan itte potkittavina. Sen molen ainaki sielä ryhmässä ymmärtäny, että tämän kielen asiaa eistävät yhistyksetki ovva ilmesesti jonki sortin riioissa keskehnään, eli heikosti ainaki pyyhkii sen osalta että ainakhaan yhteistyö tois voimia kielen aseman vahvistamisseen.

Sei lämmitä ko hetken ko houssuunsa kussee, eli jos halvaa parantaa maailmaa, niin sitten sitä kannattaa yrittää parantaa yhessä muitten kanssa, eikä niin että voivotethaan ommaa asemaa ja samala olhaan valhmiina syrjihmään muita ryhmiä toisissa asioissa. Ei net ihmisten ja asioittenkhaan välit potkimalla parane, son ainaki valehtelematon tosi!

3
Talkoo- ja vappaaehtoshommia
Merta eemäs kuvvaahmaan

Samanlaiset artikkelit

 

Kommentit

Ei vielä kommentteja. Voit kommentoida, jos haluat.
Oletko jo rekisteröitynyt? Kirjaudu tästä
Vieras
11.12.2018

CAPTCHA