Tyihäntoimittaja

Ja täälä höpötethään mitä miehleen tullee ja sitähän tullee.
5 minutes reading time (1004 words)

Jos autot olis tietokonheita

Jos autot olis tietokonheita

Autot, joilekki kovin tarpheellisia värkkiä, niilä ajethaan töihin, työajoa, ajethaan hoitahmaan asioita ja jokku ajjaa välhiin sekuvainki.

Oos sulla semmonen auto, jonka ko starttaa, niin se saattaa ottaa useamman minuutin ennenkö se reagoi mihinkhään muuhun asihaan? Mittarissa vain viisari pyörii ympyrää eikä vaikuta vatkata vaihekeppiä tai mithään kaasua painaa, auto ei reagoi tai saattaa tehä toimet vasta mahottomalla viihveelä, mittari vain pyörii ja pyörii ja moottori ilosesti hyrisee. Mitä pitemphään sie olet auton omistanu niin tämä aika vain tuntuu jatkuvan aina vain pitemphään, eikä se vain tunnu siltä.

No älä huoli, lopulta ko mittari on lopettanu ittekseen pyörimisen, niin mittaritaulun alareuhnaan syttyilee pieniä merkkivaloja vaikka millä mitalla, eikä sulla ole mithään hajua mitä net tarkottaa ja niitä tahtoo tulla vain lissää. Sitte eikö liikentheesseen, mutta hetikkö auto tullee tolkhuihinsa niin se on niin eistyksellinen, että se ossaa päivittää itteänsä ja se alkaaki lattaahmaan niitä päivityksiä, joila saatethaan korjata melkeinpä mitä vain autosta, sen usseimmiten prosessin huomaa siittä ko auto alkaa nykihmään ja eikä milhään meinaa kiihtyä norhmaaliin nopheutheen. Saataa sytyttää moottorimerkkivalonki että häätys startata uuvestaanki, mutta kuas sen tohtii siinä tehä ja syy selviääki kappahleen lopussa. Jos sie vähänkhään harvemmin ajat autola, niin tätä nykimistä saattaa jatkua matkan alusta lophuun saakka, vilkkuki saattaa syttyä vasta sen jälkhiin ko olet jo kääntyny risteyksestä, vaihteetki on ko jäässä. Ja ko sie pääset perile ja sammutat auton, niin mittaristo kertoo, että älä sammuta moottoria ko asennethaan päivitystä ja että auto sammuu sitte ko homma on valmis. Sitte sie vain tyytyväisenä jätät auton käyhmään ja toivot että se varmasti sammuu, voipihan se käyä vain puoli minuuttia tai tunnin sielä yksihneen.

Sitte ko sie tulet takasin autole sie saatatki välhiin löytää auton eehleen käynnissä, näytölekki jumittanu että tehhään päivitystä 13/23 tai että päivityksiä on tehty 13% ja siinä son sitte jumissaki. Auto ei kuitenkhaan ennää reagoi mihinkään vaikka mitä tekis. Ei auta ko napata akunkengät irti ja koittaa pistää uuehleen käythiin jos se vain lähtee, mutta jos lähtee niin saattaa vieä tovin ennenkö kone on ees sitä vaile valmis että se alkaa tekehmään sitä normaalia mittarinpyöritystä jonka jälkhiin vasta pystyy ajahmaan. Ja ko sie taas sammutat auton niin se sannoo tekevänsä taasen päivityksiä ja sannoo että älä sie sammuta autoa.

Välhiin se käy niinki, että sie saatat vaihtaa autoa uutheen ja kovasti se saattaa tuntua uusi samalta ko aikasempiki, mutta joskus se saattaa olla uuvistunu aivan kokohnaan. Näin kävi tässä pari vuotta sitte, jokku ko ajelit malliversiolla 7:lla ja ostivat uuven malli 8:n niin valmistaja oliki päättäny muuttaa sitä niin, että ko sie pistät auton käyhmään, niin mittaristossa ei olekhaan ennää viisareita ko vain värikhäitä laatikoita joissa vilistää tekstiä ja kuvia, viisarit toki saat takasin ko vain tajuaisit painaa sormela mittarin vasenta alakulmaa, vilkkukytkin ei ole ennää siinä vasemmalla ko oikealla puolen, kaasu ja jarru on vaihtanu paikkaa ja ko sie halvaat sammuttaa auton, niin sinun häätyy painaa hanskalokerosta löytyvää sammutusnappia. Mikäpä siinä ko oppii ja hoksaa että mistä tapahtuu mitäki ja moni ammattikuskikhaan ei vain heti hoksannu. Tämä malli ei ollu kovin suosittu varsinkhaan virmojen autona, ko eivät haluhneet pistää kaikkia kuskia kursseile että ossaisivat ajjaa sillä senkhään vertaa ko vanhala mallila. Valmistaja oli kuitenki ajatellu että tämön luonnostaa semmonen mitä kaikki osaa heti käyttää, se millä lokiikalla on jääny epäselväksi. No vihastuhneet omistajat sai valmistajan lopulta korjaahmaan autoja ja siirsi mm. sammutusnapin suohraan kojelauthaan, sijotteli muitaki asioita lähemmäs niitten normaalia paikkaa jne. Mutta se hääty sinun itte tajuta tehä tämä korjausliike ja ennen korjausta auto oliki pitkään puolitehonen ja ko korjaus alko niin puoli päivää käypi taas vain tyhjäkäyntiä eikä mihinkhään reagoi, auta ko pittää leetiä ajohommista. 

Valmistaja päätti hypätäkki seuraavan Malli 9:n ohi kerrala, olivat varhmaan meinahneet suunnitella siittä semmosen, että ajetlhaan takapenkiltäki ja alkoki tekheen vähän samanlaista ko se kasia eeltäny Malli 7 oli, minkä pääle omistajakki tajusit jotaki, mutta jotaki senthään ottivat siitä kasistaki, net kivat laatikot, tällä kertaa net näkkyyki yhtäaikaa tavallisten mittarien kansen. Nyt valmistaja päätti antaa vanhojen mallien omistajille uuven mallin ilmaneestä ko moni oli jo vähän kypsyny semmosseen värkkäykseen ja vaihtahneet kokohnaan merkkiä tai suunnittelmassa vaihtoa, osa oli ostanu jo skootterinki auton tilale.

Mie olenki mielenkiinnola tai itteasiassa automiehenä seurannu näitä uuven 10 mallin käythöönottoja, ei siinä mithään, kaikki on jotakuinki kohihlaan, mutta joilaki on ollu auto hallila monta päivää ja usehaan otheesseen ko eivät ole milhään saahneet sitä uutta 10 koria asennettua vanhan pääle. Montaa päivää sitä sielä yrittävät ja taas purkavat. No lopulta ko sen on saanu taas ajhoon onki voinu huomata, että ei toimikhaan ratio ennää ollekhaan. Virta tullee ration näythöön, mutta ei pihahustakhaan kaiuttimista. Sitä sitte pajale taas ihmettelehmään tai voipi olla että ajovalot pallaa vain puolitehola. Eikä kauaakhaan ko taas seuraavalla lähölä saapi ajjaa varttitunnin nykivällä autola ko jotaki päivitethään ja korjathaan ominaisuuksia ja perilä taas jäthään autoa sammuhmaan ittekseen.

Muutenki näitä tämän valmistajan autoja vaivaa paljon erikoisia ongelmia joita korjathaan siten, että sinun häätyy itte joskus selvittää, että kuas son tehny pissapohjanpumpun, että sie tiät hakea siihen itte päivitystä jostaki. Harva tietää mistä se pumppu ees löytää saati loppuja koko operaatiosta ja ko samhaan authoon on voitu tosihaan asentaa montaa eri valmistajan eri mallista pumppua.

Emmie tiä, kyllä häätyy sanoa, että jokka tämmösellä autola ajjaa niin täytyyhän niitten olla vähän masokistia. Mulla on pitkät hermot, mutta jos mie tuomosella autola joutusin ajahmaan ees vähän niin kylläpä olis pakollisekki ajot tuskaa. Tosin mitä harvemmin sitä ajais niin sitä suurempaa tuskaa se olis ko sitä pitemmän matkan sais kärsiä nykimisestä ja käyntiongelmista.

No tämä tarinahan ei kerro tietenkhään autoista ko tietokonheista ja erityisesti semmosia missä pyörii vintous käyttöjärestelmä. Kyllä häätyy ihmetellä kukka sen kanssa jaksaa tapella, mulle riittää ko mie saan huolettavaksi nuita asiakhaitten konheita jokka tahmaa ja temppuaa. Nykki muutampi viikko sitte käythöönotettu vintous 8.1 joka raksutti käythöönotossa useamman tunnin, sen jälkeen sei ole paljoa raksuttanutkhaan ko omistajalla menny sen kanssa hermot, tökkiny vain. Son nyt tuola päivän laanu yli 100 päivitystä joita pittää tehä monta kertaa ko osa ei asennu samala kertaa. Ja ko son saatu ajantasale niin eikö alota tekehmään päivitystä 10-versihoon ja sen jälkheen siihen vielä sen päivitykset pääle. Jäis tämmösekki tarinat kirjottamatta jos ittelä olis tuomonen värkki käytössä, joskus on ollu, mutta onneksi on vaihtoehtojaki.

 

 

1
Merta eemäs kuvvaahmaan
Ujo plokkari
 

Kommentit

Ei vielä kommentteja. Voit kommentoida, jos haluat.
Oletko jo rekisteröitynyt? Kirjaudu tästä
Vieras
11.12.2018

CAPTCHA