1 minute reading time (247 words)

Plokialusta meile

Plokialusta meile

Molen värkänny tämmösen plokialustan, josko saisima kerättyä Peräpohjolan murtheela eli meänkielelä ja hoon päältä puhujilta plokikirjotuksia kaikkien Internetin-käyttäjien luettavaksi, ko onhan meilä niin fiini murre eli kieli. Facebookissa onki jo monta ryhmää missä jutelhaan ja praatathaan murresanoista ja aivan mistä vain ja molen niissä ittekki monessa matkassa. Ja siksi yhteen osotheesseen, että yhessä tänne tulis säännöllisesti uutta luettavvaa ettei kenenkhään tarvi työkseen kirjottaa.

Sielä Facebookin ryhmissäkö ko olen lukenu hauskojaki porinoita, niin harmittaa ko net hukkuu sielä seinälä niin nopeasti, eikä niitä taho sitte ennää löytää ja seki vielä ko ei sinne kaikki pääse lukheen, niin mie sitte ajattelin että tämmönen kaikile auki oleva siusto olis siihen sopeva. Ei tämöle tarkotus olla mikhään Facebookin kilpailija ko täälä voipi kirjottaa vähän ehkä pitempiä juttuja, ko Facebookissa net tahtoo olla aika lyhkäsiä juttuja.

Aatu ehti ekana kirottahmaan plokiteksti ja hyä niin, ettei itte häätyny. Monta on ollu kiinnostuhneena tästä iteasta ja siittä tykäthiin Facebookissa kovastikki parissa ryhmässä, mutta vielä ei ole tekstiä ilmestynny, mutta emmä hättäile keitämä potut, eikhään niitä juttuja ala ilmestyhmään pikkuhiljaa. Täälä ootethaan nytten Hilkkoja, Helenoita, Leenoja, Satuja, Katjoja, Tanjoja, Aireja, Anuja, Eiloja Untoja, Lauria, Jukkia ja Johanneksia ja kaikkia niitäki joita ei nytten mainittu, alkakaapa aukasehmaan tarinalaaria.

Mie ootan sitte, että jos tet hoksaatta ongelmia tai sekavia ohjeita, niin tipsakkaa mulle niistä, niin mie yritän värkätä niitä kunthoon sitä mukkaa sen minkä kykenen. 

Tämä sivusto on tosihaan sitten aivan ommaa työtä, eikä tähän ole hassattu yhteiskunnan rahoja milhään muotoa. Ulkopuolisia rahottajia ei ole ollenkhaan, eli mie pistouvaan, olkaapa hövelit. 

1
Ala-aste 70-luvulla
Eka - Peräpohjolan Pänksy

Samanlaiset artikkelit

 

Kommentit

Ei vielä kommentteja. Voit kommentoida, jos haluat.
Oletko jo rekisteröitynyt? Kirjaudu tästä
Vieras
19.08.2019

CAPTCHA