Peräpohjolan Pänksy

2 minutes reading time (359 words)

Eka - Peräpohjolan Pänksy

Jovain se on rohki fiini homma tämä, että Kaitsu laitto tämmösen plokkauslatformin kunthoon. Mie piän s'on kans hyä, että se oon niinko sittoutumaton mihinkhään värkhiin, yhistyksheen tai aatheesseenkhaan. Ja jovain minua on pyyetty ennenki kirjottamhaan milloin minkäki antolokiin pärmien sisäle tai praatimhaan raatihuun, mutta ko aina tuntuu siltä, että häätyy samala hyäksyä jonku tietyn järjestön säänöt samala niin on jääny riimustukset vähhiin. Mulla ko on vähän semmonen allerkia saneltuja aatoksia vasthaan. Välilä tullee näppyjä ihan syyttä suottaki.

Yks homma mikä on kumma tässä meän nettikäyttäytymisessä, ja mistä samala näkkee kunka hullusti asiat ovva, oon seki asia, että ko mie varsin hyvin tiesin kenheen minun oli luotettava, ko mie tähhään sivustolle kirjau'uin, niin johan se tuntu vähän kummaltaki ja se miten tänne kirjau'uthaan ja miten täälä hoijethaan yksityisyyen suoja tuli tavalista tärkeämmäksi. Samala met kuitenki kaikin kirjotamma aivan mitä päähän juolahtaa, ja luotama siihen, että veispuukki ei käytä meän kirjotuksia meitä vasthaan. Koskhaan eikä ikinä. S'on kyllä aikamoinen paradoksi, ko sitä alkaa miethiin. Veispuukkiki kuitenki säästä aivan kaikki mitä sie sanot taattapaashiin. Kaikki mitä s'olet sanonu joskus veispuukissa löytyy heän taattapaasista, vaikka kymmennenki vuen takkaa. Ja sama s'on sähköpostissaki, jos sie käytät jotaki nettisähköpostia, niinko vaikka Gmailia. Sanova, että joilaki oon lokia siittäki, mitä s'olet ollu kirjoittamassaki, mutta sitte sutanu poijes. Ja, että jokku saattava vaikkapa reaaliajassa tyyrätä mitä sie mietit, näppäinpainaluksen tarkkuuela. Mutta nii s'on oikeasti kaiken kans mitä tehet sähkösesti. Kaikesta jääpii jälki. Ennen jos kävi kirjastossa, sen tiesi palveleva kirjastovirkailija. Tänhään jos sie kattot elokuvan striimipalvelusta tai ostat kirjan nettikirjakaupasta tai tehet jotaki muuta, niin se tullee järjestelmän tiethoon. Eikä sielä ole vain yks isoveli valvomassa. Niitä on niin monta ko kynnele kykenee. Mieki kirjottelen melkein kaikki veispuukkipäivitykset julkisinna, ellei jonku "ryhmän" asetukset sitä estä ja silti tämä tuntu kauhean tähelliseltä, että mie tiän mitä täälä tapahtuu kulissien takana. Ja syynä on se, että mie tunnen tyypin, joka tämän on värkänny. Eiko oleki aika sairasta ko aattelee? Minunhan pitäis nimenomhaan osata luottaa tähän enämpi, ko mie kuiten tunnnen henkilön sivuston takana, mutta ei, se toimiiki toisinpäin justhiin. Mie, joka huoletta ylheensä kirjotan kaikki aatokset kaikile. Yhtäkkiä sitä halvais muka olla joku Peräpohjolan Pänksy, joka pyssyy nimettömänä taitheen puolesta.

1
Plokialusta meile
 

Kommentit

Ylläpitäjä päiväyksellä 11.11.2014 20:43

Kiitoksia Aatu ensimäisestä plokitekstistä! Molen yrittäny suojata järjestelmän paljon sen oletusta kovemmin, sitä seuraa mm. palomuuri joka pyrkii estähmään pommitukset ja sql-kyselyt joilla yritetään päästä järjestelmään sisäle. Hallintapuolelekki on suojauksia käytössä ja järjestelmäki piethään ajantasala. Google tutkii ajottain sivua, ettei ole haittaohjelmia pessiytyny ja käyttämälläni operaattorilla on vielä omat keinot joila pyrkivät estähmään pahanteot. Salasanat suojathaan RSA-avvaimella, joka seki on yli tuhanen merkkiä pitkä. Asiakhaasta eli käyttäjistä järjestelmässä on käytännössä nimi, käyttäjänimi ja sähköpostiosote, sitte tietenki julkisenna kaikki muu toiminta eli plokitekstit. Toivottavasti saama lissääki sulta niitä.

Kiitoksia Aatu ensimäisestä plokitekstistä! Molen yrittäny suojata järjestelmän paljon sen oletusta kovemmin, sitä seuraa mm. palomuuri joka pyrkii estähmään pommitukset ja sql-kyselyt joilla yritetään päästä järjestelmään sisäle. Hallintapuolelekki on suojauksia käytössä ja järjestelmäki piethään ajantasala. Google tutkii ajottain sivua, ettei ole haittaohjelmia pessiytyny ja käyttämälläni operaattorilla on vielä omat keinot joila pyrkivät estähmään pahanteot. Salasanat suojathaan RSA-avvaimella, joka seki on yli tuhanen merkkiä pitkä. Asiakhaasta eli käyttäjistä järjestelmässä on käytännössä nimi, käyttäjänimi ja sähköpostiosote, sitte tietenki julkisenna kaikki muu toiminta eli plokitekstit. Toivottavasti saama lissääki sulta niitä.
Oletko jo rekisteröitynyt? Kirjaudu tästä
Vieras
23.05.2019

CAPTCHA